Штогод напрыканцы жніўня Глыбоцкая раённая бібліятэка ўдзельнічае ў гарадскім Свяце кветак. Сярод незвычайных кветкавых кампазіцый бібліятэчная выстава "Целительная сила природы" прыцягвала гасцей свята літаратурай, гарабатай і духмянымі сашэ.  

Кожны меў магчымасць пагартаць старонкі часопісаў, пачаставацца "халоднай гарбатай" (падрыхтаванай па сакрэтнаму рацэпту) і выбраць для сябе сашэ з пахам чабору або душыцы, лаванды або рамонка.

Ах, жнівень, Свята кветак! Колькі прыемных хвілін падарылі вы гараджанам у гэты дзень!

Жнівень

Яблычны, арэхавы, мядовы,
спасаўскі – апошні месяц лета.
Жнівень мой! Набожна-ганаровы,
сонцам мы з табой адным сагрэты.

Сталы, мудры, дбайны, паважаны,
працавіты, шчыры, клапатлівы,
стомлены, заўзяты, ураджайны…
Гэта жнівень! Гаспадар руплівы!

Ружы, астры, цыніі, вяргіні,
хрызантэмы, флёксы каля хаты.
Грушы, слівы, познія маліны…
Гэта жнівень! Шчодры і багаты!

Хлебасольны, ветлівы, гасцінны,
Дзёрзкі, заліхвацкі, жывапісны…
Вяжа гамакі ён з павуціны,
Як дзіця ў іх гойдаецца-вісне.

Зоркамі жанглюе віртуозна,
шэпчацца з ранетамі пад вечар.
Часам крыўду вылівае слёзна,
і баліць яму па-чалавечы…

Не прадзі мне смутку, жнівень родны!
Сонечныя мары мае споўні.
Атулі бацькоўскаю лагодай,
верай і надзеяю напоўні!

Яблычны, арэхавы, мядовы,
спасаўскі – апошні месяц лета.
Жнівень мой! Пад ззяннем месяцовы
мы з табой яшчэ спяём дуэтам!

Т.Цвірка

А вось і некалькі фотаздымкаў першага Свята кветак, праведзенага ў далёкім 1966 годзе. Фота з архіва В.А.Ламака.