Радзіма. Дзе яна? З чаго пачынаецца і дзе заканчваецца? Гэта індывідуальна.

Але ў кожнага чалавека ёсць шчымлівая любоў да таго краю, дзе нарадзіўся і жывеш, будзь то тайга або пустыня, горы ці мора, горад ці вёска.

Адчуванне радзімы зафіксаваў пастаўскі фотамастак Васіль Белякоў, выстава якога дзейнічала на працягу двух месяцаў у Глыбоцкай цэнтральнай раённай бібліятэцы.

За гэты час хоць на хвілінку, але затрымаліся ля фотаздымкаў звыш тысячы наведвальнікаў бібліятэкі. І кожны з іх узгадаў некалі ўбачаныя наяву даўнейшыя будынкі і далёкі лес, пачуў шапаценне дрэва ля роднай хаты, прыжмурыў вочы ад сонечных зайчыкаў у люстэрку вады… Узгадаў Радзіму… 

Дзеля гэтага і стварае Васіль Белякоў свае работы, каб кожны памятаў, што Радзіму трэба берагчы...