На змену зімы з яе халадамі і доўгімі цёмнымі вечарамі вось-вось прыйдзе цёплая, сонечная вясна, якая абудзіць нашы эмоцыі пасля зімовай спячкі. Абанемент Падсвільскай гарпасялкова бібліятэкі запрашае на “Вясенні калейдаскоп”. Менавіта пад такой назвай арганізавана другая выстава-прагляд з цыкла “Кніжныя сезоны”.

А лепшы спосаб выказаць свае веснавыя пачуцці - чытаць альбо пісаць вершы! У Сусветны дзень паэзіі, які адзначаецца 21 сакавіка, усім аматарам высокіх пачуццяў проста неабходна пазнаёміцца з паэтычнай палічкай “Залаты россып вершаў”, на якой змешчаны зборнікі беларускіх, рускіх і расійскіх паэтаў.

У раздзеле з назвай “Вясна – пара красы і абуджэння” нашы мілыя жанчыны знойдуць парады, якія адным дапамогуць вярнуць сабе форму, а другім – проста падтрымаць яе. Ёсць парады, як падабраць каляровую гаму адзення, як падкрэсліць ясныя вочы-чорныя бровы, як схаваць маршчынкі-весялінкі. Кнігі пазнаёмяць з касметычнымі працэдурамі для розных тыпаў скуры і валос, прыёмамі масажу і самамасажу, а таксама дапамогуць авалодаць мастацтвам завязваць хусткі і шалікі...

З першым вясновым цяплом мы накіроўваемся на свае любімыя дачы і кветнікі. У раздзеле “Для дачных поспехаў” чытачы знойдуць літаратуру з сакрэтамі, хітрасцямі і падказкамі па выбару гатункаў гародніны і кветак, вырошчванню якаснай расады, правілах пасадкі, вызначэнню хвароб нашых зялёных гадаванцаў і г.д.

А тыя, у каго няма дачы альбо градкі пад вакном – не перажывайце! Кнігі навучаць, як у аднапакаёвай кватэры вырасціць лук, часнок, пятрушку, таматы, агуркі, цытрыну, суніцы... Было б толькі жаданне!

Усіх жадаючых мець добрыя ўраджаі запрашаем наведаць Падсвільскую гарпасялковую бібліятэку!