Дзень маці— міжнароднае свята, ў розных краінах яно адзначаецца ў розныя часы года. У Беларусі яно прыпадае на 14 кастрычніка.

Як добра, што ёсць на свеце такі цудоўны чалавек, як матуля! Мама – гэта дабро і вернасць, любоў і пяшчотнасць, душэўнасць і сардэчнасць.

“Усё цудоўнае ў чалавеку – ад промняў сонца і ад малака маці”, – гэтыя словы Максіма Горкага памятаюцца нам са школьнай парты. Але толькі дарослымі пачынаем разумець глыбокі сэнс сказанага славутым пісьменнікам. Самыя цёплыя і светлыя ўспаміны ў нас звязаны з мамай, яе дабрынёй, мудрасцю, цярплівасцю.

У гэты святочны дзень усіх жанчын – матуль, бабуль, прабабуль, будучых матуль віншуюць са святам і жадаюць здароўя, міру, спакою, дабрабыту.                                                                                                             

У Азярэцкай бібліятэцы-музеі этнаграфіі да Дня маці таксама прайшло мерапрыемства пад назвай “Ружа для матулі”.

Навучэнцы Азярэцкай школы  даведаліся аб гісторыі і значнасці свята Маці, яго злучнасці з праваслаўным святам Пакрова Святой Багародзіцы і  народным восеньскім святам Пакровы. Адказвалі на сур’ёзныя і жартоўныя пытанні віктарыны.

Кожны з удзельнікаў расказаў пра сваю маці, якое віншаванне і падарунак зрабіў для яе. Вось як сказала адна з дзяўчат: “Для мяне матуля – самы родны і блізкі чалавек. У гэты святочны дзень я павіншавала яе і сказала самыя ласкавыя словы. Падзякавала за жыццё, якое яна мне падаравала” .

 
Фіналам мерапрыемства стаў майстар клас па вырабу розы з лісткоў клёну. Ружы, зробленыя сваімі рукамі яны падараць сваім любым матулям.