У свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова. Менавіта на гэтай мове ён размаўляе з роднымі, сябрамі, знаёмымі.

21 лютага ўвесь свет адзначае Міжнародны дзень роднай мовы. Адзначалі яго і звыш 140 нацыянальнасцей, якія пражываюць на тэрыторыі Беларусі: рускія, украінцы, яўрэі, грэкі, латышы, узбекі... Але для большасці з нас роднай з’яўляецца менавіта беларуская мова. Роднай — значыць любімай, дарагой, самай-самай...

З гэтай нагоды Падсвільская гарпасялковая бібліятэка 21 лютага правяла акцыю да Дня роднай мовы “Чытаем па-беларуску. Далучыся і ты”. З чытачамі бібліятэкары размаўлялі толькі на беларускай мове, прапанавалі ўспомніць беларускія прыказкі і прымаўкі, былі праведзены гульні. З сабой чытачы Падсвільскай гарпасялковай бібліятэкі бралі не толькі кнігі, але і рукавічкі, як сімвал гэтага дня.