21 лютага ва ўсім свеце адзначаецца Дзень роднай мовы.

Да гэтага дня ў чытальнай зале Івесьскай сельскай бібліятэцы-клубе прайшлі літаратурныя чытанні “Сіла і прыгажосць роднай мовы”. Усе жадаючыя змаглі пачуць і адчуць прыгажосць і мілагучнасць беларускага слова. Кожны меў магчымасць прачытаць уголас вершаваныя і празаічныя радкі беларускіх літаратараў.

Да мерапрыемства падрыхтавана выстава "Волаты беларускага слова" з кнігамі як класікаў беларускай літаратуры, так і  сучасных аўтараў. Тут можна пазнаёміцца не толькі з мастацкімі творамі, але і з энцыклапедычнымі выданнямі, з біяграфічнай літаратурай беларускіх асветнікаў, паэтаў і іншых дзеячаў культуры і мастацтва Беларусі.

Асобнай старонкай "Жывая мова Глыбоччыны" прадстаўлены паэтычныя зборнікі нашых глыбачан-літаратараў.

Кнігі, прадстаўленыя на выставе, цалкам на беларускай мове, маюць цудоўныя маляўнічыя ілюстрацыі, а галоўнае – даступныя кожнаму, хто наведае бібліятэку.

Прайдзі, павандруй хоць паўсвету,
А можаш і ўвесь абыйсці,
Але даражэйшай за гэту
Зямельку табе не знайсці.

Ты можаш сцвярджаць безупынна:
Жыццё за мяжою цвіце...
Але наймілейшай краіны
За гэту не знойдзеш нідзе.

Калі табе хтосьці “падкажа”,
Што моў не бывае чужых,
Дык ведай: раднейшай за нашу
Не стане ніводная з іх.

Нам дадзена мова ад Бога,
каб кожны любіў і ўжываў,
ды роднага слова жывога
ніколі, нідзе не губляў!..

Місевіч Т.У., загадчык Івесьскай сельскай бібліятэкі-клуба.