Па радыё і тэлевізару мы часта чуем песні "Жураўлі на Палессе ляцяць","Наша мова","Беларусачка","Нарачанка" і іншыя. Аднак не ведаем, што словы гэтых песен напісаў паэт Алесь Ставер, амаль што наш зямляк. Ён родам з вёскі Маргавіца, што на Бягомальшчыне, у Докшыцкім раёне. Творчасць Алеся Ставера - адметная старонка нацыянальнай паэтычна-песеннай культуры Беларусі. Яго вершы вызначаюцца мілагучнасцю, шчырасцю інтанацый, свежасцю паэтычнага мышлення, уменнем тонка перадаваць пачуцці і думкі чалавека і да ўсяго - лёгка кладуцца на музыку.

Алесь Ставер належыць да таго пакалення беларусаў, дзяцінства і юнацтва якіх апаліла вайна. Ён спаўна зведаў голад, нястачу, нямецкую няволю. Аб тым, што прайшлося перажыць у палоне, А.Ставер расказаў у кнізе "Пад канвоем".

25 кастрычніка бібліятэкар Ломашаўскай сельскай бібліятэкі Базылюк Галіна і мастацкі кіраўнік ЦК Падбярэзка Натасся запрасілі вучняў сярэдніх класаў Ломашаўскай СШ на літаратурна-музычную вечарыну "Пявучыя струны душы".Госці вечарыны даведаліся аб творчасці Алеся Ставера, чыталі яго вершы і з задавальненнем слухалі песні на яго словы.

Вершаваныя зборнікі Алеся Ставера і празаічная кніга "Пад канвоем" маюцца ва ўсіх бібліятэках раёна. Таму ўсіх, хто пажадае пазнаёміцца з творчасцю літаратара запрашаем ў бібліятэкі!