Штогод Празароцкая сельская бібліятэка праводзіць цыкл мерапрыемстваў да дня нараджэння знакамітага земляка А.Ц.Буйніцкага.

Сярод іх - знаёмствы з краязнаўчымі выданнямі, сустрэчы з цікавымі людзьмі, прэзентацыі творчасці мясцовых умельцаў.

Сёлета чытачы бібліятэкі мелі магчымасць грунтоўна пазнаёміцца з кнігамі "Глыбоччына: ілюстраваны летапіс краю" і "Глыбоччыны духоўнасці глыбіні", з  выставай работ мясцовых умельцаў “Майстры Празароцкай зямлі”. Свае работы прадставілі Фурс Марыя Віктараўна і Крупко Валянціна Мікалаеўна.

Марыя Віктараўна Фурс вылучаецца працавітасцю, добразычлівасцю, аптымістычным настроем, схільнасцю да творчасці. Яе захапленне – кулінарыя, кветкаводства, вышыванне, шыццё кастюмаў для ўдзельнікаў мастацкай самадзейнасці, вязанне. Асобна стаяць самаробныя лялькі-абярэгі, якія ў даўнія часы беражліва захоўвала кожная вясковая сям’я.

У вялікай колькасці яе работ ёсць лялькі-захавальніцы дабрабыту ў хаце, лялькі-памочнікі і добрыя дарадцы ў сямейных справах. Марыя Віктараўна гэтаму майстэрству навучылася сама, дзякуючы ўласнай фантазіі і ўмелым рукам. Усе яе работы напоўнены пазітыўнай энергіяй і шчырай любоўю.

 Яна неаднаразова праводзіла майстар-класы ў Празароцкім дзіцячым садку і школе, у мясцовай бібліятэцы. Дзеці і дарослыя дзівяцца таму, як з "бросовых" матэрыялаў Марыя Віктараўна вырабляе адмысловыя сувеніры. Багата прадстаўлены ткацкія і вышыванныя работы Марыі Віктараўны.

Марыя Мікалаеўна Крупко – шчаслівы чалавек ва ўсіх жаночых іпастасях: дачкі, жонкі, маці. А яшчэ яна - майстар па шыццю, вязанню, кулінарка і спявачка. Для сваіх вырабаў Марыя Мікалаеўна выкарыстоўвае розныя матэрыялы – тканіну, бісер, ніткі, паперу, стужкі. Укладаючы часцінку душы і напаўняючы вырабы станоўчай энергетыкай у яе руках усё ператвараецца ў мастацкія творы. Біжутэрыя -  заколкі, абручы, пярсцёнкі, завушніцы ў выглядзе кветак, чаравічкі, сумачкі і розныя іншыя ўпрыгожванні зачароўваюць юных дзяўчатак сваёй прыгажосцю.

Марыя Мікалаеўна шчодра дзеліцца сакрэтамі рукадзелля з наведвальнікамі Празароцкай сельскай бібліятэк. Майстар-класы Марыі Мікалаеўны цікавяць як дзяцей, так і дарослых. Да таго ж яна актыўная ўдзельніца мастацкай самадзейнасці Празароцкага СДК. Даўні і верны сябар бібліятэкі, яна любіць перачытваць класічныя творы і заўсёды цікавіцца  навінкамі сучаснай літаратуры.

Работы празароцкіх майстрых заўсёды ярка і жыццярадасна ўпрыгожваюць панадворкі сельсавета на раённых святах.

Запрашаем у Празароцкую сельскую бібліятэку пазнаёміцца з выставай работ нашых землякоў “Майстры Празароцкай зямлі”!