Масленіца – старажытнае свята славянскіх народаў, звязанае з культам прыроды. Для святкавання Масленіцы вызначаны восьмы тыдзень перад Вялікаднем (Пасхай).  

Сама назва свята сведчыць аб перавазе малочных страў у гэты перыяд. Галоўная ежа на Масленіцу – масла, сыр, і канешне, бліны: жытнія, пшанічныя, грэчневыя, з маслам, з смятанай, з мёдам. Многія даследчыкі традыцыйнай культуры галосна гавораць, што бліны – гэта сімвал сонца. І што ужыванне такой сімвалічнай стравы паспрыяе набліжэнню вясны. Цяжка з гэтым не згадзіцца.

У народзе Масленіца заўсёды лічылася вясёлай парой – людзі ладзілі гулянні, танцавалі, спявалі песні, пяклі блінцы і хадзілі адзін да аднаго ў госці.

Вось і ў Падсвільскую гарпасялковую бібліятэку на вечарыну “Сударыня – масленица” завіталі даўнія сябры ўстановы. Кожны з іх прыйшоў у бібліятэку са сваімі сонечнымі цуда-блінамі!

Бібліятэкары падрыхтавалі для гасцей святочную праграму. Спачатку нагадалі гасцям пра зараджэння свята:

Навукоўцы-фалькларысты і этнографы лічаць, што Масленіца адзначалася ў гонар боства Вялеса (Валоса), якое з’яўлялася ахоўнікам жывёлы. Вялес на працягу года зберагаў статак, клапаціўся пра яго павелічэнне, таму свята было ўрачыстай падзякай богу-ахоўніку. Пазней, з прыняццем хрысціянства, адным з цэнтральных момантаў свята стаў чацвер на масленічным тыдні, у які ўшаноўваўся святы Уласій — прадаўжальнік язычніцкага Вялеса (гэтаму ў значнай ступені, відаць, садзейнічала гукавое падабенства, блізкасць імён). Уласій — хрысціянскі святы, якога ў 312 г. язычнікі пакаралі смерцю за тое, што ён не пажадаў пакланяцца старым багам, а прыняў веру Хрыста.

Распавялі, што масленічны блін з'яўляецца не проста святочным пачастункам, а сімвалам сонца. Лічылася, што з'еўшы такую ​​страву, чалавек, атрымае часцінку сонечнага святла і цяпла, і чым больш бліноў напякуць, тым больш будзе сонечных дзён увесну. Таму бліны пякліся і еліся ў незлічоных колькасцях.

Выпякаўся звычайна цэлы стос бліноў, першы з якіх яшчэ цёплым клалі на дахавае акенца для продкаў. Лічылі, што яны сілкуюцца парай ад першага, рытуальнага, бліна. 

Расказалі пра традыці мяслічнага тыдня:

Панядзелак - "Сустрэча". Адкрываюцца кірмашы. Рыхтуюцца месцы гулянняў. Робіцца лялька Масленіцы.

Аўторак - "Заігрыш". З гэтага дня пачынаюць хадзіць адзін да аднаго ў госці і катаюцца з горак. Незамужнія дзяўчаты варожаць.

Серада - "Ласуха". Зяці ідуць да цешчы на бліны.

Чацвер - "Шырокі чацвярток". Пачынаецца шырокая масленіца: пякуць і ядуць шмат бліноў, танцуюць, вяселяцца, удзельнічаюць у кулачных бойках.

Пятніца - "Цешчыны адвячоркі". Маладыя запрашаюць бацькоў нявесты. Зяць абавязаны асабіста паклікаць цешчу.

Субота - "Залоўкіны вячоркі". Маладыя нявесткі запрашаюць да сябе родных мужа і абдорваюць іх падарункамі.

Нядзеля - "Провады". Пудзіла Масленіцы водзяць па вёсцы і з захадам сонца спальваюць на вялікім вогнішчы. У гэты дзень прынята папрасіць прабачэння адзін у аднаго.

Удзельнікі мерапрыемства дзяліліся рэцэптамі найсмачных бліноў, адказвалі на пытанні віктарыны, удзельнічалі ў конкурсах, спявалі прыпеўкі і танчылі. Свята ўдалося на славу!

Хто на Масленку сумуе,

Таму ў годзе не шанцуе.

Таму давайце зараз

Будзем гульні граці,

Зіму праважаці,

Зіму праважаці,

Вясну сустракаці.

Будзем забаўляцца

I блінцамі сілкавацца.

Яцкоўская С.П., загадчыца Падсвільскай гарпасялковай бібліятэкі