У Падсвільскай гарпасялковай бібліятэцы прайшла краязнаўчая гадзіна  “Ой, зайграю я ў дуду”.

Госці бібліятэкі, вучні мясцовай школы, пазнаёміліся з гісторыяй дуды як музычнага інструмента і гісторыяй менавіта глыбоцкай дуды. Даведаліся, што дуда ў 2023 годзе стала аб’ектам гісторыка-культурнай спадчыны і ўнесена ў Дзяржаўны спіс гісторыка-культурных каштоўнасцяў Рэспублікі Беларусь.

Глыбоцкі край увайшоў у дударскі рэгіён Паазер’я (Падзвіння) як найбольш цесна звязаны  з такой гісторыка-культурнай з’явай. Нездарма на Глыбоччыне некалькі год назад нарадзіўся, шумеў-гудзеў фестываль "Дударскі рэй" і знаёміў глыбачан з гасцямі-дударамі блізкага і далёкага замежжа.

Бібліятэкары распавялі пра музычны інструмент і зрабілі агляд выданняў, прысвечаных дудзе, у тым ліку кніг Віталя Воранава. А падлеткі чыталі вершы пра дуду, глядзелі відэазамалёўкі, слухалі найгрышы з дударскіх фэстаў, знаёміліся з работамі мясцовых умельцаў на дударскую тэму -  вацінанкі і саламяныя вырабы. 

Зразумела, што рэальнае гучанне такога старажытнага музычнага інструменту больш уражлівае і запамінальнае. Але і завочнае знаёмства з дудой было цікава маладым падсвільчанам.

Яцкоўская С.П., заг. Падсвільскай гарпасялковай бібліятэкі