У пятніцу, 24 лютага, Залесчына святкавала Масленіцу. Спеўна, шумна, з вясёлымі песнямі, імклівымі карагодамі і смачнымі блінцамі.
Запрудскі дом фальклору сумесна з Залескай школай і Залескім сельскім Саветам дэпутатаў прадставілі тэатралізаваную праграму ”Масленіца ідзе, бліны ды мёд нясе“ ў рамках праекта ”Фальклорная скарбонка“.
Да мясцовых артыстаў далучыліся і глыбачане. У гэты дзень быў запланаваны сумесны выезд аддзела аўтаклуб і бібліёбуса.

Пакуль удзельнікі спявалі песні, танчылі і блінцы выпякалі, залескія чытачы кніжкі выбіралі. Пад вясёлую музыку і пах духмянай гарбаткі на зёлках чаму б і не?
Не сцярпелі і нашы бібліятэкары – да святочнай дзеі далучыліся!
Разам з жыхарамі Залесчыны і госцейкамі шумна-весела зіму праводзілі, цяпер вясны чакаюць!