У Падсвільскай гарпасялковай бібліятэцы правялі фальклорную гадзіну "Ідзе Каляда".

Удзельнікі клуба “Сяброўкі” правялі абрад калядавання. Каляды - старадаўняе абрадавае свята, у славян сімвалізавала пачатак новага года. Пачатак Каляд - вечар напярэдадні Раства Хрыстовага, заканчэнне - на Вадохрышча.

Да Каляд прымеркаваны калядныя абходы: пераапранутыя калядоўшчыкі абходзяць дамы з песнямі, танцамі і добрымі пажаданнямі. Калядоўшчыкі  --  дзед-механоша, які сімвалізуе памерлых продкаў, мядзведзь, сімвал здароўя,сілы і каза, сімвал урадлівасці,  з каляднай віфліемскай зоркай наперадзе прадставілі  тэатралізацыю гэтага даўняга і вельмі вясёлага абрада. Ля цэнтральнай ёлкі пасёлка  гучалі калядныя песні і віншаванні, якія ўслаўляюць гаспадара і гаспадыню. 

Затым удзельніц клуба запрасілі ў чытальную залу Падсвільскай гарпасялковай бібліятэцы. За духмянай гарбатай прадоўжылася святкаванне Раства Хрыстова і Новага года, былі спевы, скокі, конкурсы, гульні...

У гэты дзень у бібліятэцы панаваў сапраўдны святочны настрой! Спадзяёмся, што вясёлага і радаснага настрою хопіць на ўвесь год!

 Сёння свята

 Бы абрусам пакрывае

Наваколле свежы снег.

Сёння свята — люд гуляе,

Чутны жарты, песні, смех!

Грай, музыка, не лянуйся,

Расцягні гармонік свой,

Каб замёрзлы дол прачнуўся

I забыўся пра спакой!

Каляда ў снягах варожыць,

Месяц шчасце раздае,

Ён між зорак важна ходзіць,

Кожнай вокам падміргне.

А па вёсцы з той нагоды

(У адзенні — не пазнаць)

Моладзь водзіць карагоды:

Час прыйшоў калядаваць!

Пажадаем жа на свята

Шчасця, радасці зямной.

Дабрабыт у нашы хаты

Хай цячэ, як плынь вясной!

                                                                                  М.Кукуць

Аўласевіч Н.К.