11 кастрычніка ў Глыбоцкай дзіцячай бібліятэцы адбылося чарговае паседжанне клуба “Калейдаскоп”, якое было прымеркавана да Дня Маці.

Падчас гадзіны духоўнасці “Душы мацярынскай святло” шасцікласнікі чыталі падрыхтаваныя дома вершы, пазнаёміліся з гісторыяй узнікнення свята Пакрова Прасвятой Багародзіцы ігісторыяй сучаснага Дня Маці. Вучні разглядалі карціну Рафаэля “Сіксцінская мадонна”, даведаліся аб тым, што ў беларускай літаратуры ёсць нямала твораў аб самаахвярнасці маці, яе гатоўнасці ў любы момант засланіць сваіх дзяцей ад бяды і небяспекі ( А. Куляшоў “Маці”, М. Танк “Голас”, “Рукі маці”, Е. Лось “Маці”, Я. Брыль “Маці”, П. Броўка “Голас сэрца”, В. Быкаў “Знак бяды”, С. Алексіевіч “У вайны не жаночае аблічча” ). З іншымі творамі пра маці вучні змаглі пазнаёміцца на выставе “Ты адна такая мілая, родная”.

Пасля праслухоўвання і абмеркавання “Казкі пра гусыню” В. Сухамлінскага і апавядання “Сыны” В. Асеевай дзеці зразумелі, што трэба берагчы, шанаваць і любіць сваіх маці.

Потым для вучняў быў праведзены майстар-клас па вырабе падарункаў да Дня Маці.

15.10.2019                                      Бібліятэкар   А. А. Хахолка