“Дружба” ў Глыбоцкай дзіцячай бібліятэцы
18 жніўня Глыбоцкую дзіцячую бібліятэку наведалі дзеці з летняга лагера “Дружба” ДУА “Мярэцкаўская дзіцячы сад - базавая школа Глыбоцкага раёна”. Для іх была праведзена экскурсія па бібліятэцы “Кніга – крыніца ведаў”. Дзеці пазнаёміліся з фондам бібліятэкі, абанементамі старэйшым і малодшым, чытальнай залай. Пабывалі на “Караблі ведаў”, дзе пагарталі энцыклапедыі з розных галін ведаў. Асаблівая ўвага падчас экскурсіі была нададзена знаёмству з выставай “Вехи памяти и славы”, якая прысвечана Году гістарычнай памяці. Вучні таксама паўдзельнічалі ў выставе-гульні “Знайдзі адказ у кнізе” па кнігах Г.В. Трафімавай і С.А. Трафімава. Дзеці выбіралі пытанне па цікавай для іх тэме, а затым знаходзілі адказ у патрэбнай кнізе.
Пасля экскурсіі для школьнікаў было праведзена мерапрыемства “Мая Глыбоччына” ў форме “жывой газеты”, якая складалася з чатырох рубрык.
Рубрыка “Гісторыя і памяць” пазнаёміла вучняў з гербам горада, легендай аб паходжанні назвы “Глыбокае”, падзеямі Вялікай Айчыннай вайны на тэрыторыі Глыбоччыны, роляй Іосіфа Корсака ў будаўніцтве святыняў Глыбоцкага краю.
У рубрыцы “Людзі Глыбоччыны” дзеці даведаліся пра Язэпа Драздовіча, Віктара Ламака, Паўла Сухога, Віталя Воранава (пераклаў кнігу “Вінні – Пух” на беларускую мову).
Пра Вішнёвы фестываль, помнік барону Мюнхгаўзену, возера Доўгае, шпака (прыродны сімвал Глыбоцкага краю) дзеці даведаліся з рубрыкі “Краявіды Глыбоччыны”.
У рубрыцы “З нагоды”, прысвечанай Году гістарычнай памяці, успомнілі беларускі фальклор, развучылі гульні “Мікіта” і “Сляпы музыка”.
На працягу мерапрыемства выкарыстоўваліся гульнёвыя моманты, фізкультхвілінка, чытанне ўрыўкаў з мастацкіх твораў, прагляд урыўкаў з мультфільма, беларуская народная музыка, выстава кніг пра Глыбокае.
У гэты дзень дзеці яшчэ раз пераканаліся, што жывуць у цудоўным і непаўторным, багатым на гістарычныя падзеі і знакамітых людзей краі.
18.08.2022 Бібліятэкары М.Г. Трапук, А.А. Хахолка
- 473
