“Раз, два, тры, чатыры, пяць – завітай да нас чытаць!” – пад такой назвай работнікі Шунеўскай бібліятэкі запрашалі на экскурсію 15 верасня  сваіх юных чытачоў.

Спачатку завіталі першакласнікі. Яны з задавальненнем знаёміліся з кніжкамі-малышкамі, з кніжкамі з серыі “Мая першая кніжка” і “Чытаем па складах”, захапляліся кнігамі з незвычайным дызайнам: кніжка-мышка, кніжка-тэатр, кніжка-церамок і інш. Затым, перамясціўшыся ў чытальную залу, пазнаёміліся з часопісамі “Непоседа”, “Веселый зоопарк”, “Вясёлка”, з “Дзіцячай газетай”. Бібліятэкары навучылі дзяцей рабіць паштоўкі, макеты якіх можна знайсці на старонках часопіса “Непоседа”, падарылі “наклекі” з часопіса “Весёлый зоопарк”, на якіх змяшчаюцца віды розных жывёл і птушак. Дзеці ахвотна справіліся з заданнем “Размалюй казачнага героя” і затым лёгка знаходзілі кнігу з намаляванай казкі.

Развітаўшыся з першакласнікамі, бібліятэкары ўжо сустракалі наступных гасцей - вучняў 2 класа. Для іх быў паказаны відэаурок “Такія розныя бібліятэкі”. Дзеці даведаліся, якімі ж цікавымі і прыгожымі могуць быць храмы кнігі. Пазалота, шыкоўнае ўбранства і незвычайная архітэктура гаворыць пра тое, што людзі да кнігі заўседы адносіліся з павагай і пашанай. Адказаўшы на пытанні пасля відэаўрока, дзеці атрымалі заданне размясціць казачных герояў у свае казкі. Для гэтага яны атрымалі намаляваных персанажаў і набор кніг, трэба было беспамылкова адправіць героя ў сваю казку. Усе з заданнем справіліся і атрымалі прызы.

Вучні 5 класа таксама рашылі не застацца ў баку і  дружна завіталі ў бібліятэку, каб павіншаваць яе работнікаў са святам. Для іх таксама быў паказаны відэаурок “Такія розныя бібліятэкі”, а заданне было больш складаным. Дзецям трэба было спачатку знайсці схаваных у чытальнай зале казачных герояў, а, знайшоўшы, размясціць у казку, з якой яны збеглі. Кнігі шукаць трэба было ў фондзе бібліятэкі. Справіліся ўсе, але якасць была рознай. Хтосьці вярнуў у казку 4, 5 герояў, а хтосьці 1-2-х. Але настрой гуляць і перамагаць быў ва ўсіх.

Бібліятэкары паказалі дзецям самую маленькую кніжачку, якая маецца ў бібліятэцы – “У вянок Адаму Міцкевічу” і самую цяжкую – “Полацк”, якую ўсім захацелася патрымаць.

Вось так насычана правялі работнікі Шунеўскай бібліятэкі сваё прафесійнае свята.

20 верасня 2020г.                   Заг. бібліятэкі І. Нікіфаровіч