Цікавы чалавек, як цікавая кніга.

Перагортваючы старонкі кніг, мы даведаемся пра герояў, падзеі, пераносімся ў той свет, аб якім распавядае твор. Размаўляючы з цікавым чалавекам, мы пранікаем у яго свет, пазнаём цікавыя факты яго жыцця і, самае галоўнае, яго думкі. Бо нашы думкі вызначаюць нашу будучыню.

23 лютага на базе Глыбоцкай цэнтральнай раённай бібліятэцы адбылося пасяджэнне падлеткавага клуба “Преодоление препятствий”, якое прайшло ў фармаце сустрэчы з цікавым чалавекам. Госцем мерапрыемства стаў  старшы ўчастковы інспектар Глыбоцкага РАУС  Дзяніс Віктаравіч Барысаў.

На сустрэчы ішла гаворка не толькі і не столькі аб прафесіі, якую  абраў Дзяніс Віктаравіч.

Дзякуючы кнігам і фільмам, прафесія ўчастковага інспектара агорнутая ледзь ці не рамантычным арэолам. Лічыцца, што гэтыя людзі  ведаюць усіх і ўся, гатовыя ў любы момант прыйсці нам на дапамогу.  І гэта сапраўды так! А яшчэ прафесія накладвае свой адбітак на характар чалавека і атрымліваецца, што ўчастковы інспектар – гэта і  дарадца, і памочнік, і педагог, і псіхолаг.

Аднак, яны звычайныя людзі, ў якіх ёсць сваё асабістае жыццё і ўласныя захапленні. Захапленне Дзяніса Віктаравіча —  – сталярства, пра якое ён распавядаў таксама з захапленнем. Любоў да работы з дрэвам прыйшла асэнсавана, у дарослым ўзросце і захапіла сваім пахам і ўзорам (кожнае дрэва мае свой водар і структуру), цеплынёй матэрыяла.

Напрыканцы сустрэчы Дзяніс Віктаравіч выказаў пажаданне  ўдзельнікам    сустрэчы знайсці сваю дарогу ў жыцці і абраць прафесію, якая стане любімай на ўсё жыццё.

Юркевіч Ж.Б., бібліятэкар чытальнай залы