Прэзентацыя новай кнігі Людмілы Баброўскай “Босиком по радуге” адбылася ў Падсвільскай гарпасялковай бібліятэцы.

У зборнік увайшлі кароткія апавяданні "нон-фікшн", казкі, фэнтэзі са славянскім ухілам. А таксама апавяданні пра  людскія адносіны, сяброўства і адказнасць чалавека перад чалавекам. Героі апавяданняў - звычайныя людзі, якія  перажываюць першыя пачуцці ўлюблёнасці, эмоцыі кахання, боль здрады. Сюжэты для многіх апавяданняў прапанавала само жыццё.

Аўтар валодае дзіўным талентам казаць пра складаныя рэчы простай мовай. Чытач пагружаецца ва ўласныя ўспаміны, разважае і думае над хітраспляценнямі жыцця і паваротамі лёсу, пачынае  больш уважліва глядзець вакол сябе і на сябе.

Людміла Антонаўна распавяла прысутным аб тайне нараджэння твораў, аб тым хто і што дапамагае ёй рухацца наперад, развіваць літаратурны  талент.

Нам вельмі прыемна, што бібліятэка з'яўляецца месцам сілы для творчых асоб нашага пасёлка, што падсвільчане прыхільна і паважліва ставяцца да сваіх землякоў і іх творчых памкненняў.  Справа застаецца замалым - узяць у рукі чарговую кнігу зямлячкі і пачынаць чытаць!

Мы шчыра віншуем Людмілу Антонаўну з выхадам чарговай кнігі і зычым ёй і  надалей цікавых сюжэтаў і легкага пяра!

Яцкоўская С.П., заг. Падсвільскай гарпасялковай бібліятэкі.