Братам  нашым, сёстрам–героям,

Каб вечна іх слава квітнела

На нашай, на вольнай зямлі,

Каб вечна жыла яна ў сэрцах,

Гарэла світальнай зарою,

Якую вятры-навальніцы

Ніколі згасіць не змаглі б...

                                            М.Танк

в.Каралевічы

Помнік на брацкай магіле жыхароў в. Каралевічы, расстраляных гітлераўцамі 7 лістапада 1942 г. Сярод расстраляных – паэт Алесь Дубровіч, яго бацька і два браты.

На помніку надпіс “Редько Егор Францевич 1872. Сыновья Алексей 1910, Василий 1905, Дмитрий 1903, Капшуль Василий Петрович 1989 погибли в 1942 году” і шыльда “Воінскае пахаванне №5595”.

 в.Галубічы

У 1964 годзе ў в.Галубічы пастаўлены помнік землякам, бязвінным ахвярам вайны. На помніку надпіс “Вечная слава героям, павшим в боях за свободу и независимость нашей Родины” і прозвішчы загінуўшых. Сярод іх 13 чалавек, імёны якіх узгаданы і 16 безымянных мірных жыхароў.  Помнік – бетонная стэла,  наверсе  – чырвоная зорка.

урочышча Чыстае

На правым беразе ракі Чысцянка знаходзіцца мемарыяльны знак у гонар партызан брыгады «Кастрычнік» Вілейскага партызанскага злучэння, якія ў 1943-44 гг. вялі баі су­праць нямецка-фашысцкіх акупантаў. На абеліску надпіс “Здесь в 1941-1944 годах народные мстители вели бои с неметско-фашистскими карателями”. Помнік зроблены з камня і цэменту ў  1968 г.  рабочымі і служачымі Ліпаўскага лясніцтва. Помнік размешчаны ва ўрочышча Чыстае, за 0,5 км на паўднёвы ўсход ад в.Чыстае, па дарозе Падсвілле  – Чыстае – Кублічы.

урочышча Жвіроўня

Брацкая магіла абаронцаў Айчыны і ахвяр вайны.  У 1942 г. ва ўрочышчы Жвіроўня каля в.Галубічы нямецка-фашысцкія захопнікі расстралялі 100 савецкіх актывістаў, жыхароў в.Галубічы і іншых навакольных вёсак. 46 імён загінуўшых вядомы, 54 –  невядомы. Магіла знаходзіцца за 200 м. ад вёскі.

Помнік з бетону на месцы гібелі ўстаноўлены ў 1964 годзе і ўяўляў сабой бетонны абеліск з зоркай наверсе. На ім быў надпіс: “Вечная память героям, павшим в борьбе с немецко-фашистскими  захватчиками в Великой Отечественной войне”  і дошка з імёнамі загінуўшых. На поўнач ад вёскі Галубічы.

Л-ра: Кур’яновіч А. Жыццё пражыта недарэмна // Шлях перамогі.- 1964.- 27 чэрв.- С.3-4.

У 1998 годзе на брацкай магіле ўстаноўлены новы помнік. На гранітным абеліску выбіты імёны загінуўшых. На помніку шыльда “Воінскае пахаванне №5598”. 

 Л-ра:  Веснік Глыбоччыны.-2009.-22 ліпеня; Саулич В. Там, где плачут берёзы… / Владимир Саулич // Віцебскі рабочы.- 2009,- 21 июля.

в.Белякі

11 красавіка 1944 г. 15 мірных жыхароў вёскі Белякі сталі ахвярай нямецка-фашысцкіх акупантаў. У ліпені  2009 года памяць аб ахваярах, якія пахаваны на могілках вёскі Іванаўшчына, увекавечана 6-ціметровым крыжом. Крыж устаноўлены работнікамі Глыбоцкага мясакамбіната, сельгаспрадпрыемства "Каралі", Галубіцкага сельвыканкама і другчармета.

Л-ра: Анюціна, А. Увекавечана памяць загінуўшых жыхароў вёскі Белякі Анюціна А. // Веснік Глыбоччыны.- 2009.- 22 ліпеня; 

Саулич, В. Там, где плачут берёзы… / Владимир Саулич // Віцебскі рабочы.- 2009.-  21 июля

05.05.2017 г.  брацкаму пахаванню нададзены статус "Воінскае пахаванне № 7555". Л-ра: Карніловіч, Л. Тут лёсы сплецены ў адзін / Л.Карніловіч // Веснік Глыбоччыны. — 2017. — 1 ліпеня