Глыбоцкі хлебазавод. Ведай наша
Да 85-годдзя Глыбоцкага раёна
Глыбоцкі хлебазавод будаваўся 2 гады і пачаў дзейнічаць ў 1974 годзе. Праектная магутнасць яго складала 32 тоны хлебабулачных вырабаў у асартыменце і 60 тон жытняга фармавога хлеба.
У 1979 г. прадпрыемства набыло абсталяванне бесперапыннага дзеяння. Паралельна на існуючых плошчах быў абсталяваны кандытарскі цэх і асвоена тэхналогія вытворчасці мучных кандытарскіх вырабаў (пернікі, бісквіты і т. п.).
У 1994 г. на хлебазаводзе быў пабудаваны і ўведзены ў дзеянне склад бястарнага захоўвання мукі адкрытага тыпу ёмістасцю 250 тон.
У 1997 г. завод асвоіў тэхналогію вытворчасці штучнага мёду і яблычнага джэму для патрэб вытворчасці.
У верасні 2001 г. на прадпрыемстве была адрамантавана лінія і асвоена тэхналогія прыгатавання вадкіх заквасак з ужываннем тэрмафільных малочна-кіслых бактэрый, што дазволіла арганізаваць выпуск палепшаных заварных гатункаў хлеба.
У мэтах пашырэння асартыменту выпускаемай прадукцыі ў снежні 2001 года была асвоена тэхналогія вытворчасці макаронных вырабаў і праведзена рэканструкцыя 3-й лініі па выпуску заварных подавых хлябоў і арганізацыя працоўнага месца па выпуску сухарыкаў-грэнак.
На сённяшні дзень хлебазавод абсталяваны пячнымі агрэгатамі ФТЛ-2-81, Г4-ХПФ-12, Мусон-ротар. Хлебазавод забяспечвае вытворчасць хлебабулачных вырабаў (у асартыменце) – 20 тон у суткі, кандытарскіх вырабаў – 0,9 тон у суткі.
Бліжэйшай прыярытэтнай задачай з'яўляецца павелічэнне выпуску подавых гатункаў хлеба на базе печы Г4-ХПФ-16М, што дазволіць павялічыць аб'ём вытворчасці, палепшыць якасць і павысіць канкурэнтаздольнасць прадукцыі.
Глыбоцкі хлебазавод мае 3 фірменныя магазіны, ларок «Гарачы хлеб» на тэрыторыі хлебазавода, таксама ажыццяўляецца выязны гандаль.
У снежні 2015 года ў адміністрацыйным будынку філіяла "Глыбоцкі хлебазавод" ААТ "Віцебскхлебпрам" адбылося ўрачыстае адкрыццё музея пад назвай «Дорога хлеба».
Г
алоўнай задачай работы хлебазавода з'яўляецца забеспячэнне патрэб насельніцтва хлебабулачнымі і кандытарскімі вырабамі высокай якасці і ў патрэбным асартыменце, а таксама атрыманне неабходных фінансавых рэсурсаў для развіцця і аднаўлення вытворчасці.
Адрас: Глыбоцкі хлебазавод, філіял ААТ «Віцебскхлебпрам».
Віцебская вобласць, Глыбоцкі раён, г. Глыбокае, вуліца Леніна, д. 146.
Хлебныя словы
Адценне слоў – не глупства,
Ты ім не пагарджай.
Скарынка. Скіба. Луста.
Акраец. Каравай.
Акраец – шлях, дарога
І зайцаў хлеб лясны.
Скарынка – сум, трывога
І боль былой вайны.
Здараецца, вядома,
Што, выпіўшы ў гасцях,
Грызе скарынку дома
Пахмурны халасцяк.
А скіба – дзень вясновы.
Ралля. Плугі. Сяўба.
Наш хлеб – жыцця аснова,
Працяг і барацьба.
А луста – слова сытнае,
Духмянае і шчодрае.
Яно ад маці – сітнае
Ці наздравата-чорнае.
А каравай – вясельнае,
Святочнае яно.
На ручніку нясе яно
І радасць, і віно.
І справа тут не ў ежы,
А ў смачным змесце слоў,
І ў жытным ветры свежым,
І ў звоне каласоў…
ЛІТАРАТУРА
1. Берникович, Д. Музей хлеба / Д. Берникович // Витебские вести. – 2015. – 3 марта. – С. 5.
2. Жнивень, А. Глубокое: жемчужина в центре Европы / А. Жнивень // СБ. Беларусь сегодня. – 2019. – 12 янв. – С. 20.
3. Зінкевіч, А. На хлебазаводзе адкрыўся музей «Дарога хлеба» / А. Зінкевіч // Веснік Глыбоччыны. – 2015. – 28 лют. – С. 1, 4.
4. Зінкевіч, А. Самы смачны хлеб Глыбоцкі / А. Зінкевіч // Веснік Глыбоччыны. – 2018. – 3 лют. – С. 1, 4–5.
5. Панкрат, А. Хлебом едины / А. Панкрат // Веснік Глыбоччыны. – 2018. – 17 лістап. – С. 6.
6. Усцінаў, А. Прысмакі ад Глыбоцкага хлебазавода / А. Усцінаў // Веснік Глыбоччыны. – 2018. – 18 ліп. – С. 4.
- 131
