Старонкі гісторыі Глыбоцкай цэнтральнай раённай бібліятэкі. 1966-1976  гады.

30.11.2015

На пачатак 1970 г. кніжны фонд Глыбоцкай раённай бібліятэкі складаў больш 36 тыс. экз. літаратуры. Налічвалася звыш 4 тысяч  чытачоў.  На прадпрыемствах і  ўстановах горада дзейнічала 17 бібліятэк-перасовак.

Узросшая актыўнасць, масавае павышэнне прафесійнага ўзроўню праз сістэму завочнага навучання патрабавала змянення форм і метадаў работы з чытачамі. Для гэтага шырока выкарыстоўваліся індывідуальная праца з наведвальнікамі бібліятэкі, агляды літаратуры, масавыя мерапрыемствы. Быў вельмі запатрабаваны фонд чытальнай залы, у якім мелася шмат вучэбнай літаратуры. 

Ідэалагічны накірунак выхавання насельніцтва патрабаваў цесных сувязяў работнікаў бібліятэкі з партыйнымі, камсамольскімі і прафсаюзнымі арганізацыямі горада. З маладымі людзьмі ў чытальнай зале і непасрэдна на прадпрыемствах і ў арганізацыях праводзіліся канферэнцыі “Роль кнігі ў камуністычным выхаванні моладзі”, тэматычныя вечары “Вучымся камунізму, будуем камунізм”, вывучаліся творы генеральнага сакратара ЦК КПСС Л.І.Брэжнева “Малая зямля”, “Возрождение”, “Целина” і інш.   

Дзеля павышэння якасці абслугоўвання чытачоў, аддзел культуры арганізоўваў сярод бібліятэк раёна сацыялістычныя спаборніцтвы па выкананню асноўных паказчыкаў. Вынікі працы падводзіліся штоквартальна, вызначаліся пераможцы. Інфарамцыя аб ходзе выканання размяшчалася на стэндзе ў раённай бібліятэцы і друкавалася ў раённай газеце.

У гэты перыяд на чале Глыбоцкай раённай бібліятэкі стаяла Алена Афанасьеўна Тарасенка. Сваю працоўную дзейнасць Алена Афанасьеўна пачала бібліятэкарам Падсвільскай гарпасялковай бібліятэкі, разам з калегамі правяла цэнтралізацыю і ўзначаліла Глыбоцкую цэнтралізаваную бібліятэчную сістэму. Пэўны час працавала загадчыкам Глыбоцкага аддела культуры, на заслужаны адпачынак пайшла з пасады загадчыка Глыбоцкай дзіцячай бібліятэкі.  Адказны кіраўнік, граматны спецыяліст, яна любіла і ўмела працаваць з людзьмі. У сферы культуры Алена Афанасьеўна адпрацавала 35 год.

Пад яе апекай многія маладыя бібліятэчныя работнікі сталі сапраўднымі спецыялістамі сваёй справы. Гэта Людміла Пятроўна Вязьменава, Ніна Андрэеўна Протас, Людміла Міхайлаўна Багдановіч і інш.