Фонд Глыбоцкай раённай бібліятэкі папоўніўся новымі выданнямі з аўтарскімі подпісамі.

Кніга “Мая выцінанка”  падпісана сааўтарам Наталляй Сухой з  пажаданнямі чытачам чытаць, вучыцца і выцінаць!

У кнізе даецца гісторыя такога віда мастацтва, як выцінанка, прыклады выкарыстання выразанак у наш час і асноўныя прыёмы выразання. Выданне з'яўляецца цудоўным дапаможнікам выхавацелям, матулям і бабулям для далучэння дзетак да мастацтва і развіцця іх фантазіі. Маюцца метадычныя рэкамендацыі і лекалы. 

Анатоль Крэйдзіч аставіў аўтограф на сваёй кніжцы “Палескі Напалеон”. з пажаданнем "на добрае прачытанне". Героі аповесці і апавяданняў – нашы суайчыннікі, гараджане і вяскоўцы, якія жывуць у цяперашнім часе з сучаснымі праблемамі. У твораў цікавыя сюжэты, сакавітая, па-сапраўднаму беларуская мова. 

А калі вас зацікавіць інфармацыя пра палескага Напалеона – калі ласка ў бібліятэку за кнігай!

І яшчэ адзін літаратар з Палесся – Уладзімір Кулік, падараваў чытачам свой раман “Ведьма полесская”.  “Хороший художественный язык, некий мистический флёр и увлекательный сюжет свойственны роману..”, - такія меркаванні чытачоў аб рамане гомельскага аўтара, дарэчы, работніка культуры Калінкавіцкага раёна.

Дзякуй паважаным аўтарам за добрыя словы ў бок чытачоў!  Упэўнены, што  вашыя кнігі знойдуць сваіх прыхільнікаў.