Якіх толькі музеяў не прыдумана! Ад вялізных, сусветна вядомых комплексаў, дзе захоўваюцца бясцэнныя шэдэўры, да аднаго пакойчыка, дзе змяшчаецца калекцыя выяў котак ці сямейныя фотаздымкі... Ёсць музеі, прысвечаныя аднаму экспанату: гэта можа быць і цэлы карабель, і звон, і карціна. Такія, як музей валуноў у Мінску, не маюць даху і сцен. У Мексіцы ёсць падводны музей з размешчаных на дне мора скульптур, у Японіі — музей локшыны хуткага прыгатавання, у палацы Пуслоўскіх у беларускім Косаве — музей праса. Дзесьці ў свеце існуюць музей разводаў, музей кепскага мастацтва, музей ашыйнікаў для сабак...