У 2019 годзе выдавецтва “Народная асвета” распачало выпуск серыі кніг для падлеткаў “Тусоўка.by”

Аповесць Аляксандры Хамянок “Італьянскае падарожжа”, якая выйшла ў гэтай серыі,  увайшла:

- у лік фіналістаў літаратурнага конкурсу “Новая дзіцячая кніга”, а таксама

- у лонг-ліст Міжнароднай дзіцячай літаратурнай прэміі імя У.П. Крапівіна і

- лонг-ліст VII Міжнароднага конкурсу імя С.У. Міхалкова на найлепшы мастацкі твор для падлеткаў.

Кніга А.Хамянок  “Італьянскае падарожжа” нарэшце ўвайшла і ў фонд Глыбоцкай дзіцячай бібліятэкі :-))).

Аповесць  распавядае пра дзяўчынку Кацю. Ёй адзінаццаць гадоў. Яна страціла маму і жыве з дзядзькам і цёткаю.

Дзяўчынка трапляе ў праграму дапамогі дзецям-сіротам і едзе ў Італію. Але доўгачаканае падарожжа аказваецца зусім не такім, якім уяўлялася Каці. Яна не разумее ні слова, сумуе па маме і марыць хутчэй вярнуцца дахаты. Дзяўчынку акаляюць незнаёмыя людзі, зусім розныя: маладыя і не вельмі, спагадлівыя і грубаватыя.

Аднак менавіта яны дапамагаюць ёй адкрыць новы свет і зразумець, што яна не адна.

Гэтая кніга пра надзею. Самота паступова робіцца сінонімам мінулага. Вядома, пустэчу ў душы ніхто і нішто не запоўніць. Але побач з’явяцца сяброўства, радасць, любоў.

         Прыемнага чытання!

 Хамянок, А. Італьянскае падарожжа : аповесць / А.Хамянок. –

Мн. : Народная асвета, 2021. – 158 с. — (Серыя «Тусовка.by»)

Андрыеўская Т.І., заг. Глыбоцкай дзіцячай бібліятэкі