8 ліпеня  бібліятэкар  запрасіла юных чытачоў  на  краязнаўчую велавандроўку “Сцяжынкамі роднага краю”. Прынялі ўдзел у мерапрыемстве і супрацоўнікі Ломашаўскага ЦК. Спачатку бібліятэкар пазнаёміла з гісторыяй в.Ломашы з самага пачатку яе стварэння,калі вёска налічвала ўсяго 5 хат.Зараз гэта вуліца Задарожная.Потым  перайшла да гісторыі  сучаснага аграгарадка Ломашы з 7-ю вуліцамі, па якіх  ўсе дружна і  праехаліся.

Затым шлях пралёг праз в.Гатаўшчыну на  чыгуначную станцыю Загацце. Дзяжурная па станцыі Вальмус Л.А. правяла  вельмі цікавую і змястоўную  экскурсію.Яна  пазнаёміла дзяцей з прафесіяй чыгуначніка, расказала пра рабочыя моманты сваёй прафесіі.

Дзеці   з задавальнем правялі фотасесію ў фуражцы з сігнальным дыскам.

Пад уражаннем экскурсіі рушылі да руін старой ваданапорнай башні,наведалі месца, дзе  калісьці стаяла Загаццеўская школа,  пабудаваная яшчэ пры Польшчы ў 1936 годзе.

Завяршылася велавандроўка ля паваротнага кальца,месца, дзе праходзіла калісьці мяжа  Расіі і Польшы, а ст.Загацце была памежнай  станцыяй  Польшы. Крыху адпачыўшы, стомленыя , але задаволеныя  рушылі дадому.

                                            Бібліятэкар   М.В.Спасібёнак